• Kryetari i Partisë Demokratike hap fushatën elektorale: Jemi këtu të gjithë bashkë dhe jam mes jush sepse ju keni marrë një vendim shumë të rëndësishëm ti japim së bashku fund tranzicionit shqiptar dhe të hapim një faqe të re të historisë moderne dhe europiane të Shqipërisë.
• Të mundësojmë që më të mirët, më të ndershmit të drejtojnë fatet e vendit sepse familja jonë e madhe Shqipëria ka nevojë sot më shumë se kurrë për punë, nder dhe ndryshim rrënjësorë. Sepse ne sot më shumë se kurrë duhet të mbrojmë e të vendosim në vendin e duhur krenarinë tonë të kahershme kombëtare si shqiptarë
• Ne po luftojmë kundër një grushti njerëzish që janë gati të bëjnë gjithçka vetëm për të mbajtur karriget e tyre por në të vërtetë ata nuk na qeverisin por ju shërbejnë vetes dhe ortakëve të tyre që po rrëmbejnë përmes akteve grabitqare gjithçka që ky vend ka, pasuritë tuaj, pasuritë e kombit.
• Ky vend meriton më shumë, shqiptarët meritojnë më shumë dhe prandaj ne jemi sot këtu para jush që tua bëjmë të qartë të gjithëve, ne shqiptarët meritojmë më shumë dhe mundemi të bëjmë më shumë dhe do të bëjmë më shumë.
• Çdo gjë e mirë që i ka ndodhur këtij vendi, gjithçka që ka ndryshuar për mirë në këtë vend mban vulën e rinisë, ka fytyrën e saj. Ndaj edhe kësaj herë vendi ka nevojë për rininë, ndryshimi kërkon mbështetjen e saj që është derdhur në këtë shesh e anembanë Shqipërisë
• Unë vi para jush për të shpallur një tjetër synim, një detyrë, një mision që i përgjigjet dëshirës së çdo shqiptari ndaj të cilit dhe ndaj të cilës angazhohem: Kur të më zgjidhni kryeministër detyra e parë madhore, misioni im hyjnor, misioni ynë hyjnor është futja e Shqipërisë në Bashkimin Europian.
• Të qëndrojmë bashkë sa më afër, të bisedojmë ditë për ditë me njeri tjetrin, të bindim këdo që është në kërkim të shpresës se po punoj për një qëllim të lartë, se po punojmë për një qëllim fisnik, po punojmë për të garantuar një ndryshim të thellë, të vërtet e të pakthyeshëm për bijtë e shqipes. E që ky ndryshim të bëhet realitet secili nga ne duhet ti bashkohet kësaj përpjekjet.
• Unë besoj tek ju, unë jam krenar për ju bashkëqytetarët e mi dhe ndjehem i nderuar për misionin e lartë që më keni besuar. E di që së bashku dhe vetëm së bashku ne do të kapërcejmë çdo pengesë dhe do të përmbushim çdo ëndërr.
• Dashuria për fëmijët, për familjet, për njeri-tjetrin, dashuria për Shqipërinë është forca që na mbush zemrat dhe na ushqen mendjen. Dhe dua që këtë dashuri të mos e përflasë në erë, por t’jua dëshmoj duke u shërbyer drejt rrugës së ndryshimit.
• Ndryshimi që ka filluar që ka zbritur sonte në këtë shesh siç ka zbritur në mendjet dhe zemrat e shqiptarëve kudo ku janë. Bashkë për ndryshimin, bashkë për Shqipërinë i sigurt që së bashku do të fitojmë, Shqipëria do të fitojë.
Mirëmbrëma Shqipëri!
Përshëndetje ju motra dhe vëllezër që keni mbushur këtë shesh. Ju motra dhe vëllezër shqiptar kudo që ndodheni në këtë mbrëmje hyjnore të bashkimit tonë për ndryshim me të cilin do të fitojë Shqipëria dhe çdo shqiptar.
Mirëmbrëma kandidatëve të Partisë Demokratike të Shqipërisë, aleatëve tanë të koalicioni, ekipit tonë të fitores dhe ndryshimit për çdo shqiptar. Edhe 31 ditë. Vetëm 31 ditë për të nisur së bashku rrugën e ndryshimit të Shqipërisë, rrugën e zhvillimit, të punësimit, të mirëqenies dhe të integrimit të saj në familjen tonë europiane. Jemi këtu të gjithë bashkë dhe jam mes jush sepse ju keni marrë një vendim shumë të rëndësishëm ti japim së bashku fund tranzicionit shqiptar dhe të hapim një faqe të re të historisë moderne dhe europiane të Shqipërisë. Të mundësojmë që më të mirët, më të ndershmit të drejtojnë fatet e vendit sepse familja jonë e madhe Shqipëria ka nevojë sot më shumë se kurrë për punë, nder dhe ndryshim rrënjësorë. Sepse ne sot më shumë se kurrë duhet të mbrojmë e të vendosim në vendin e duhur krenarinë tonë të kahershme kombëtare si shqiptarë, sepse duhet të ndalojmë një orë e më parë këtë varfërim dhe këtë zbrazje që po i ndodh sot Shqipërisë, sepse nënat dhe motrat tona duhet të kursen nga dhimbja që shkakton braktisja e vatrave të familjes, që si pasojë sjell braktisjen e madhe që ka pllakosur sot mbarë vendin, sepse Shqipëria gjithmonë ka qenë kryelartë në shekujt e trazuar të historisë së vet. Dhe ne jemi sot këtu si përgjigje e thirrjes së saj për të ndalur dorën që zhvat pasuritë e kombit, dorën që vret shpresën e shqiptarëve dhe mendjen e errët që kërkon të mbjellë frikën dhe dyshimin në zemrat e bashkatdhetarëve tanë. U bënë më shumë se një vit që filluam këtë marshim, këtë rrugëtim për të ndryshuar vendin tonë. Është një rrugëtim i vështirë por të cilin ne e kryejmë me përgjegjësi dhe me një gëzim të brendshëm sepse ne jemi të vetëdijshëm se puna jonë është një përkushtim dhe sakrificë për vendin, për shqiptarët, për Shqipërinë, për kombin sepse po shkulim dhe çrrënjosim nga damarët e tokës tonë një kast, një grusht, një të keqe që ka vendosur të shterojë dhe të përvetësojë për interesat e veta të gjitha pasuritë dhe burimet që Zoti kaq bujarisht ia ka falur Shqipërisë. Dhe po luftojmë kundër një grushti njerëzish që janë gati të bëjnë gjithçka vetëm për të mbajtur karriget e tyre por në të vërtetë ata nuk na qeverisin por ju shërbejnë vetes dhe ortakëve të tyre që po rrëmbejnë përmes akteve grabitqare gjithçka që ky vend ka, pasuritë tuaj, pasuritë e kombit. Por vëllezër dhe motra ne po zhvillojmë edhe një betejë tjetër, një betejë brenda vetes. Unë e di se pas 8 vitesh zhgënjime, mashtrime shumëkujt i ka humbur besimi e shumëkush mendon se ky vend nuk ndryshon. Për të gjithë ata që kështu mendojnë unë kam një pyetje për ju. A është kjo ajo që ne meritojmë? A janë varfëria dhe kostoja e jetës që rritet çdo ditë e më shumë ajo që ne meritojmë? A është mungesa e vendeve të punës, papunësia dhe mjerimi ajo që meritojmë? A është largimi nga sytë këmbët i rinisë, i këtij populli të talentuar, ajo që meritojmë? A është ky fati i shkruar për secilin prej nesh? Jo, nuk ka gënjeshtër më të madhe se kjo. Ky vend meriton më shumë, shqiptarët meritojnë më shumë dhe prandaj ne jemi sot këtu para jush që tua bëjmë të qartë të gjithëve, ne shqiptarët meritojmë më shumë dhe mundemi të bëjmë më shumë dhe do të bëjmë shumë më shumë për njëri-tjetrin dhe për Shqipërinë. Për muaj të tërë ditë pas dite kam shkuar në çdo qytet, në çdo cep, në çdo kënd të Shqipërisë kam ndjerë etjen për ndryshim, kam prekur me duart e mia shpresën, kam marrë përqafimet e ngrohta shpresëdhënëse kudo nga jugu në veri. Kam folur dhe kam shpjeguar se gjërat mund të shkojnë më ndryshe dhe më mirë dhe kam njoftuar në çdo derë dhe familje shqiptare që më ka hapur derën se ndryshimi po vjen, se ndryshimi do ta sjellim, se Shqipëria do të ndryshojë. Kam lexuar në sytë tuaj një nxitje dhe një forcë të papërsëritshme, një frymëzim për të ecur përpara që vetëm një popull i vuajtur por i vendosur për t’i dhënë fund vuajtjes di si ta japë dhe po ju zbuloj sot, çfarë më kanë thënë shqiptarët anë e kënd Shqipërisë. Jemi gati për një ndryshim të madh por na e hiqni këtë peshë të rëndë që kemi mbi supe. Këta qeveritarë që vetëm na zhvasin, që nuk na zgjidhin asgjë, që pasi kanë zhvatur gjithçka duan të na vrasin dhe shpresën dhe besimin. Dhe ne të gjithë së bashku me 25 prill do t’ja heqim popullit tonë këtë barrë të rëndë nga supet, do të clirojmë oksigjen dhe energji pozitive për çdo shqiptar. Pse nuk mund të jetojmë më mirë, pse fëmijët tanë duhet të shkojë nën shtete të tjera për të bërë të shquar, për të shkëlqyer, për tu punësuar, për tu shkolluar dhe për tu përparuar. Pse mos të marrin pagat që meritojnë në vendin tonë, pse kaq shumë prindër e të rinj nuk gjejnë punën e përshtatshme për talentin e tyre për aftësitë edhe prirjet e tyre këtu në Shqipëri por vetëm jashtë saj. Sot shqiptarët e kuptojnë më mirë se meritojnë më shumë se vendi ka nevojë të ndryshojë, njerëzit tanë e kuptojnë se meritojnë më shumë vende pune dhe se Shqipëria e ka të mundur t’ju japë më shumë vende pune dhe se Shqipëria e ka të mundur t’ju jap më shumë vende punë, se meritojnë një qeveri më të mirë, një qeveri që do të punoj për ta dhe jo për veten e saj. Ndaj me ekipin tonë të mrekullueshëm me qindra ekspert të vendit dhe të huaj kemi përgatitur dhe kemi gati për zbatim plane serioze pune të cilat do të ndryshojnë jetën e familjeve shqiptare, të rinis shqiptare, të grave shqiptare, të çdo kujt që dëshiron të punoj e të jetoj me djersën e ballit, pra të gjithë shoqërisë së drejt e të ndershme shqiptare. Sepse ne do të sjellim një qeveri që do të kujdeset për ju, një qeveri që kujdeset për Shqipërinë tonë. Thirrja ime nga ky shesh është për ty që kërkon një mundësi për të ikur nga ky vend, për ty që ndoshta po mbledh para borxh për të paguar kamionin për Angli duke rrezikuar jetën tënde, mos ik, qëndro, lufto, lufto me mua, lufto me ne. ky vend mund dhe do të bëhet dhe ti do ta ndërtosh jetën tënde këtu. Thirrja ime është për ty nënë, motër, që punon pa pushim, e që mezi siguron ushqim për fëmijët e tu, mos e lër dhimbjen ta mbush shpirtin tënd, ki besim, ditë më të mira po vijnë për ty dhe të dashurit e zemrës. Thirrja ime është për ty fermerë, që punon gjithë ditën e në fund prodhimet I gropos, mos u dëshpëro, mos u dorëzo, së shpejti do të kesh në krahë dhe jo kundër qeverinë që meriton, mundi e djersa jote nuk do të shkojë më dëm. Thirrja ime është për ju mijëra familje që pandemia ju ka zhytur në borxhe për të blerë ilaçe, mos u dëshpëroni, nuk do të jeni më të braktisur. Ndryshimi po vjen. Ne do t’ju ndihmojmë. Thirrja ime është për ty sipërmarrës që e mbylle apo që po të falimenton biznesi, mos u dorëzo, qëndro. Shumë shpejt dot të arrish të ringrihesh dhe të shijosh frytet e punës me shumë të ardhura për ty, për familjen tënde, për të punësuarit, me një qeveri në krahun tënd. Për ty është thirrja ime sot kryefamiljar që ke humbur venin e punës dhe sot nuk ke mundësi të kujdesesh për familjen tënde. Nesër do kujdesemi bashkë si një familje e madhe për ty, ekonominë dhe mbarë Shqipërinë. Thirrja ime është për ju gjyshe dhe gjyshër, nëna dhe baballarë që me pensione sot nuk paguani dot as ujë e drita e ilaçe! Nesër do të jetë ndryshe! Dita e dinjitetit dhe mirënjohjes dhe kujdesit për ju, po afron! Që ju të keni më shumë mundësi dhe vendin që meritoni në familjet tona dhe në shoqërinë tonë! Sepse për të gjitha këto dhe shumë më shumë, Shqipëria i ka mundësitë, i ka resurset dhe ne do t’i vëmë në shërbimin tuaj! Miqtë e mi, të rinj dhe të reja studentë dhe studente, lulja e kombit tonë, energjia shpirti dhe forca e këtij vendi, bij dhe bija të Shqipërisë mbushini zemrat me shpresë, bashkohuni me ne për të ndryshuar këtë vend dhe për ta bërë atë si gjithë Europa. Rini shqiptare, çdo gjë e mirë që i ka ndodhur këtij vendi, gjithçka që ka ndryshuar për mirë në këtë vend mban vulën tuaj, ka fytyrën tuaj. Ndaj edhe kësaj herë vendi ka nevojë ju, ndryshimi kërkon mbështetjen tuaj që e keni derdhur në këtë shesh e anembanë Shqipërisë. Për 8 vitet e fundit Shqipëria i është larguar Bashkimit Europian për faj të qeverisjes dhe kryeministrit në ikje. Shëndetësia jonë tregtia jonë, arsimi ynë, shëndetësia, gjithçka vazhdojnë të jenë në krizë, të preken, të varfërohen thellësisht nga fakti që Shqipëria është larg pranimit në Bashkimin Europian. Jetët tona do të jenë shumë më të mira në çdo drejtim ku Shqipëria të plotësojë ëndrrën e saj dhe të bëhet pjesë e Bashkimit europian dhe unë e di se si arrihet kjo. E mbani mend si thonin ishte e pamundur që Shqipëria të hynte në NATO por ne caktuam një pikësynim, punuam fort dhe ia dolëm, sot Shqipëria është falë nesh anëtare e NATO-s. Mbani mend si të gjithë thonin se nuk mund të arrihej marrëveshja për lëvizjen e lirë pa viza, se ishte e pamundur, se s’kishte asnjë shpresë që shqiptarët të lëviznin të lirë, pa viza, me pasaportat e tyre. Por ne caktuam një pikë synim . Ne punuam fort dhe ia dolëm. Sot vij para jush për të shpallur një tjetër synim, një detyrë, një mision që i përgjigjet dëshirës së çdo shqiptari ndaj të cilit dhe ndaj të cilës angazhohem: Kur të më zgjidhni kryeministër detyra e parë madhore, misioni im hyjnor, misioni ynë hyjnor është futja e Shqipërisë në Bashkimin Europian. Që Shqipëria të jetë e fortë, e përparuar, e mirë për të gjithë, na duhet urgjentisht t’i lëmë pas 8 vite ngecje, 8 vite hapa prapa, 8 vite larg Europës dhe të nisim marshimin tonë të pandalshëm deri në anëtarësimin e plotë të kombit të shqipeve, në familjen tonë europiane! Vëllezër dhe motra, qytetarë dhe qytetare për të arritur këtë çlirim dhe këtë ndryshim, për të arritur këtë aspiratë që sapo ju fola ne, ky ekip që shihni sot dhe unë kam nevojë për ndihmën tuaj sepse pa ju ëndrrat më të bukura, planet më serioze shndërrohen në përralla dhe në pluhur. Pa ju, pa ndihmën e mbështetjen tuaj qëllimet tona për ndryshimin e madh që na pret mbeten thjeshtë ide dhe jo një udhëzues drejt një jete më të mirë. Në javët e ardhme le të qëndrojmë bashkë sa më afër, të bisedojmë dit për dit me njeri tjetrin, të bindim këdo që është në kërkim të shpresës se po punoj për një qëllim të lartë, se po punojmë për një qëllim fisnik, po punojmë për të garantuar një ndryshim të thellë, të vërtet e të pakthyeshëm për bijtë e shqipes. E që ky ndryshim të bëhet realitet secili nga ne duhet ti bashkohet kësaj përpjekjet. Bashkë për ndryshim Shqipëria fiton. Sepse nuk mund tua fsheh forca e vërtetë e ndryshimit jeni vetëm ju. Unë jam këtu në mesin tuaj si lajmëtarë, si një udhërrëfyes për të marrë rrugën dhe shtegun e duhur. Kam pra nevojë për ju, për ndihmën tuaj, për forcën tuaj ndaj ju kërkoj sot të më bashkoheni në përpjekjet e fundit e fundit të këtij rrugëtimi për t’i sjellë ndryshim Shqipërisë. Unë besoj tek ju, unë jam krenar për ju bashkëqytetarët e mi dhe ndjehem i nderuar për misionin e lartë që më keni besuar. E di që së bashku dhe vetëm së bashku ne do të kapërcejmë çdo pengesë dhe do të përmbushim çdo ëndërr. Dashuria për fëmijët, për familjet, për njeri-tjetrin, dashuria për Shqipërinë është forca që na mbush zemrat dhe na ushqen mendjen. Dhe dua që këtë dashuri të mos e përflasë në erë, por t’jua dëshmoj duke u shërbyer drejt rrugës së ndryshimit. Ndryshimi që ka filluar që ka zbritur sonte në këtë shesh siç ka zbritur në mendjet dhe zemrat e shqiptarëve kudo ku janë. Bashkë për ndryshimin, bashkë për Shqipërinë i sigurt që së bashku do të fitojmë, Shqipëria do të fitojë. Ju faleminderit shumë! Zoti e bekoftë Shqipërinë!
(FJALA E KRYETARIT TË PD, LULZIM BASHA NË HAPJEN E FUSHATËS ELEKTORALE NË SHESHIN “NËNË TEREZA”TIRANË, MË 25 MARS 2021)
